اشعار حکیم تیلیم خان

شاهکاری ماندگار از حکیم تیلیم خان

ای آغلار سیزه تعریف ائیله ییم
روخصت آلیب عالیشاندان گلیرم
آغیز داوات ، گؤز موركب ، دیل قلم
آلتمیش پیلله نر دیواندان گلیرم

بو جهاندا عاشیقلارین دوستویام
ایچمیشم پیاله ، عشقین مستی یم
آلمیشام مورادیم کمر بستی یم
ایمام ریضا غریباندان گلیرم

اوتورموشام اؤز حالیمه آغلارام
درد بیلنین جیگرینی داغلارام
گزرم اؤلکه نی جمعین باغلارام
مونجیمم (معتصمم)، آسیماندان گلیرم

اؤلکه میز «ایراق» دیر شهرمیز ساوا
مزلقان چاییندان گؤتوردوم هاوا
عاشیقلار دردینه ائیلرم داوا
من طبیبم هیندوستاندان گلیرم

بیلنلر بیلسین لر من تیلیم خانام
بیلمه ینلر بیلسین ، گؤوهرم ، کانام
مرغئی ساکینی ، اصلی تورکمانام
گزه گزه بو جهاندان گلیرم

حکیم تیلیم خان دیوانی

نویسنده اسداله امیری

این خبر را به اشتراک بگذارید :