شعر ترکی درمورد فلک

شعر غمگین ترکی

فلک ندن بئله یازدی یازیمی
ائل ایچینده تک، اولموشام دونیادا
غریبجه یاشادیم، یالقیزجا سولدوم
بولوت تکین لاپ دولموشام دونیادا

یاغیش اولوب یاغدیم قوری چؤللره
دامجی اولوب دامدیم آچان گوللره
یاغدیم فیکیرلره سوزدوم دیللره
ایندی دیلسیز من قالمیشام دونیادا

فلکیندن پایلاشیرام بؤلورم
اؤز دردیمه اوتورموشام گولورم
بوآلیشان اودلار سؤنمز بیلیرم
قیزیل گولم من سولموشام دونیادا

سون یوللارین سؤزون آچما آماندی
گونوم،گوندن ، حالیم حالدان یاماندی
غلط دوران،بئله ترسه زاماندی
دؤیولموشم،سوورولموشام دونیادا

اوزومده هئچ بیلمیرم نه ائدیرم
«تَدَیُّن»ام درد یاخاسین دیدیرم
چک الینی اللریمدن گئدیرم
انسانلاردان یورولموشام دنیادا