شعر ترکی در مورد مادر

شعر ترکی در مورد آنا

آنامین باغریندان آیریلا بیلمم

قویما اوشاقلاری آغلار آ داغلار

آنامین میضرابین آلما ألیندن

میضرابا گؤز دیکیب آغلار آداغلار

میضرابی آلمیسان ساز نه دن دی بس؟

آناسیز روح گئدر بو بدن دی بس

دونیایا کیم گلیب او گئدن دی بس

ساز سیز اورکلری داغلار آ داغلار

لای لاسی ساز سسی،قولاخدا آخیر

سسی بیر ایلدیریم ایللردی شاخیر

گؤزوم یوللارینا گؤز دیکیب باخیر

کیم اونون ایزلرین ساخلار آ داغلار؟

آناسیز آرزی لار محو اولوب ایتیب

هاردا کی وارسا او آرزی لار بیتیب

بولمورم،ائله کی گؤز گؤزه دیکیب

آغیزدا دیلیمی، باغلار آ داغلار

من سه گؤناهکارام سن باغیشلا سن

کؤنلومه بیرده یاغ سن یاغیشلا سن

اؤزومی اؤزومدن آل باخیشلا سن

أریمز دئییرسن ، قارلار آ داغلار؟

دئینه آراز آتیل بوغول آرازدا

یا اؤل قوتار یا کی دوغول آرازدا

دئینه آنا باخ بو اوغول آرازدا

بس سونا گلمه جک دارلار آ داغلار؟

سؤزوم بوکی وطن منه بیر آنا

هرکسه نین جوتدی گرکدیر آنا

بیری وطن بیری دوغاندیر آنا

کیم آنامی، مندن آلار آ داغلار؟

آنا آیریلیقی، آغیر آرازا

اوتای بوتای بیر آنادیر آرازا

دوشمن گلیب قان قانادیر آرازا

اینتیقامین کیم بس آلار آ داغلار؟

من آرازام،جوشماق، منه یاراشیر

بو شعرلری قوشماق منه یاراشیر

آزاد اولوب اوشماق منه یاراشیر

کیم منی اوشماقدان،سالار آ داغلار؟