بافاسیز دونیا

شعر ترکی درباره بی وفایی دنیا

 

 

وفاسیز بو دونیا یا بئل باغلاما
وار گونونده چوخ سئوینیب چاغلاما
پیس گونونده خوش گونونه آغلاما
انسانی چوخ سیخیب ازر بودونیا
گونده‌ مین جور اویون بزر بودونیا

زورلو لارین بوکدو بوکولمز قولون
چوخلاری‌نا وئردی هر شئین بولون
چوخ یول بیله‌ن لره آزدیریب یولون
اوممادیغین یئرده گزر بو دونیا
گونده مین جور اویون بزر بودونیا

آغلایا آغلایا اولوب گوله‌سن!؟
بیری گئده سونرا قدرین بیله‌سن
قهر بوغا آیاق اوسته اؤله‌سن
داش کیمین هر درده دؤزر بو دونیا
گونده مین جور اویون بزر بودونیا

بیر گون یارلا تک لیغی‌نی دانارسان
کرم اولوب عشق اودونا یانارسان
بیر واخت یئتر آیریلیقی قانارسان
یارین الین سندن اوزر بو دونیا
گونده مین جور اویون بزر بودونیا

بیر گؤزو کور دو بیر گؤزو خماردی
گؤز یاشینا یئریکله‌یر اوماردی
سکگیزینه دوققوز چکر قوماردی
گوله‌ن دوداغلارین بوزر بو دونیا
گونده مین جور اویون بزر بودونیا

فرزین نقی یان