شعر تیلیم خان برای امیر المومنین

شعر امیرالمومنین از تیلیم خان

امیرالمونین قیزیل کونبذی

حقین اوزو نظر سالدیغی یئرده

یئتمیش ایکی ایگید قوربان کسیلدی

موسی موناجاتا گلدیغی یئرده

یعقوب پیغمبرین گوزونون یاشی

آخوبان دلردی یئرده کی داشی

یوسیفه ظولم ائتدی اون بیر قارداشی

آپاریب قویویا سالدیغی یئرده

اوچ آیلیق یوللاردان گلدی بیر کروان

یوسیفی چیخارتدی دوشدویو چاهدان

آپاردی میصیرده ساتدی بازرگان

زولئیخا وورولدو آلدیغی یئرده

آغام علی دولدول اوسته آشاردی

نئچه کافرلرین باغری پیشردی

ذوالفقارین پاریلتیسی دوشردی

گون گئدیب پرتووو قالدیغی یئرده

تیلیم دئیر نرلر یوکو دوزولدو

باغیردی آغزیندان کفلر سوزولدو

کوثرین سویوندان شربت ازیلدی

ابراهیم کعبه نی سالدیغی یئرده