شعر ترکی از بختیار فرخ
شعر ترکی از بختیار فرخ
كئفى وار كئفى
سئودالانیب آیریلیغین اوْدوندا
سارالیب سوْلماغین، كئفى وار كئفى!
اۆره‌ك دار اوْلاندا یامان چاغیندا
گؤزلرین دوْلماغین، كئفى وار كئفى!
اؤلومون دوْنونو جانا بیچمكدن
سئوگیلی یوْلوندا جاندان گئچمكدن
‘خیضر’اوْلوب دیریلیك سویون ایچمكدن
‘ایسكندر’اوْلماغین، كئفى وار كئفى!
اره‌ن ایگیت دؤنر اولدوزا، آیا
نئجه ییخدی! اؤزون ‘ولی پوریا’
حریف آناسینین گؤینو سینمایا
بئله ییخیلماغین، كئفى وار كئفى!
یومدو اؤلكه‌سینین شاهلیغیندان گؤز
‘ادهم’ نئجه سولطان اوْلدو بو سیرسؤز!
ایینه‌سینى بالیق گتیردى سؤزسۆز
بئله دورولماغین، كئفى وار كئفى!
سئودالی‌لار اوْینار سئودا اوْیونون
‘حلاج’ین داردا گؤر؛ توْیون-دۆیونون
“بختیار” منم‌لیك منجیل قوشونون
قاناتین یوْلماغین، كئفى وار كئفى!
؛
(بختیار فرّخ)
